Ano Na ang Mangyayari sa Iglesya ng Hinaharap?

Halos (kung hindi man) lahat ng mga magulang na kilala ko ay nais na magkaroon ng magandang kinabukasan ang kanilang mga anak. Gusto nila ang mga ito na maging pinakamahusay, maabot ang pinakamataas na potensyal nila, at para sa ating mga Kristiano, nais natin silang maligtas din at mabuhay nang nakalulugod sa Diyos at sa Kanyang Salita—mapa-doktrina o mapa-isinasapamuhay.

Ngunit ako’y natatakot na baka ang ating mga pangarap sa ating mga anak ay hindi maging isang realidad. Iniisip natin na ginagawa naman natin ang pinakamainam para sila’y mapalaki nang tama, ngunit hindi natin alam—baka nagkakamali tayo. Iniisip natin na tama ang ating mga pamamaraan, at mukha namang maganda sa simula—pagkatapos pagdating ng panahon napapa-isip tayo, “Ano’ng nangyari sa anak ko?” At mula diyan nararapat nating pagbulay-bulayan ang isang tanong.

Ano nang mangyayari sa iglesiya ng hinaharap? Kung hindi tayo maingat, ang mga bata ngayon ay maaaring maging matatandang tumalikod sa hinaharap—ang tumalikod na iglesiya ng hinaharap. Dahan-dahan, ang pagbabago sa doktrina at pamumuhay ang sisira sa mga susunod na henerasyon.

Hindi mo na kailangan pang tumingin pa sa malayo para malaman mong ito’y nangyayari. Personal akong nakakaalam ng isang iglesiya na mayroong service para sa mga matatanda at isa pa para sa mga young people. Hindi na masama ang paghihiwalay church services sa pagitan ng grupo ng edad ay masama, ngunit hindi iyon ang kaso. Ang rason kung bakit sila pinaghihiwalay ay dahil gusto ng mga adults ang mga himno at gusto naman ng mga young people ng ‘masayang’ mga kanta! Ang nakakatakot ay karamihan sa mga young people na ito ay mga anak ng mga adults ng parehong church! Heto pa ang isang iglesiya, ang mga bata ay niloloko yung mga awitin  na kinakanta nila sa Sunday School, at, tulad ng sinasabi ng isang guro doon, ay namamato sila ng mga nilamukos na papel sa teacher habang nasa klase! Gayundin, sa isang matandang iglesiyang alam ko, lahat ng mga babaeng matatanda ay nagdadamit nang maayos sa church service, samantalang ang mga young people rin nito ay naka-mini skirt at spaghetti. At lumaki sila sa church!

Hindi ko naman sinasabi na iyon ay dahil sa atin lahat—ang halimbawang ipinapakita ng mga matatanda ay malakas nang impluwensya para maisip nila na gawin ang tama. Ngunit, ang tanong, hindi kaya posible na may mali din sa ating ginagawa? Nababahala ako na baka hinahayaan lamang natin (o pinepwersa) ang ating anak na gawin ang isang bagay, ngunit wala man lang silang maliit na ideya kung bakit dapat nila itong gawin, o kung bakit dapat nilang gawin ang isang bagay sa ganito at ganyang paraan. At kaya, pag lumaki na sila, hindi nila ito paniniwalaan, o gagawin, o kahit man lang gawin ito sa paraan na inaasahan nating gagawin nila.

Ang mas lalong nakaka-alarma ay hindi natin ito napapansin, mas lalo na na may gawin patungkol dito.

Ating alalahanin: ang iyong mga anak—ating mga anak, ang iglesiya ng hinaharap. Anuman ang ating itinuturo natin sa kanila o hindi tinuturo sa kanila ang makakapag-dikta kung anong uri ng iglesiya ang ating binubuo para sa kinabukasan.

 

Nagsisimula ito sa ating mga magulang. Basahin mo ang Deuteronomy 6. Ang kabanatang ito ang magpapaalala sa inyo ng kahalagahan na maturuan at masanay ang mga bata. Pansinin ang mga talata 1-2, at 7,

Ito nga ang utos, ang mga palatuntunan, at ang mga kahatulan, na iniutos ng Panginoon ninyong Dios na ituro sa inyo, upang inyong magawa sa lupaing inyong paroroonan upang ariin:

Na ikaw ay matakot sa Panginoon mong Dios, na iyong ingatan ang lahat niyang mga palatuntunan at ang kaniyang mga utos, na aking iniutos sa iyo, sa iyo, at sa iyong anak, at sa anak ng iyong anak sa lahat ng araw ng iyong buhay; at upang ang iyong mga araw ay lumawig….

At iyong ituturo ng buong sikap sa iyong mga anak, at iyong sasalitain tungkol sa kanila pagka ikaw ay nakaupo sa iyong bahay, at pagka ikaw ay lumakad sa daan, at pagka ikaw ay nahihiga at pagka ikaw ay bumabangon.

 

Ang prinsipyong ito ay nag-a-apply din sa paraan ng iglesiya sa pagtuturo nito sa bata, dahil doon napapatatag ang pamilya. Hindi dapat nagko-kontrahan ang iglesiya at pamilya, mapa-doktrina o mapa-isinasabuhay.

Ngayon ay magsimula tayo ng isang check-up.  Subukan mong tanungin o obserbahan ang isang bata (12 pababa, maaaring maging anak mo) tungkol sa ilang aspeto ng ating pananampalataya at pamumuhay. Iyon ang magsasabi sa iyo kung nagagawa mo ang iyong trabaho.

Doktrina. Tanungin mo siya tungkol sa mga pangunahing katuruan ng ating pananampalataya. Ilan ang Diyos? Paano ka maliligtas? Madadala ka ba sa langit ng bautismo? Ano ang Bible? Ang mga ito ay ilan sa mga pangunahing tanong na dapat mong pag-isipan sa pagkatao ng isang bata. Kung mali ang naisasagot ng bata sa mga tanong na ito, ibig-sabihin ay hindi talaga niya natutunan ang dapat niyang paniwalaan. Natutunan ni Timoteo ang mga pangunahing doktrina ng pananampalataya nang siya ay bata pa (2 Timoteo 3:15), at ito ang naging isa sa mga hindi maitatangging dahilan kung bakit siya naging isa sa mga pinakabatang pinuno ng iglesiya noong panahon niya.

Pagdalo (Attendance). Talaga bang gusto mong uma-attend ng church, o pinipilit ka lang? Kung dumadalo ka sa church service, sa tingin mo ba ay talagang kailangan itong gawin? Dapat ba ay lahat ng pagtitipon ay daluhan? Dapat ka bang mag-behave nang maayos sa service? Maraming mga magulang ang pinipiling iwanan na lamang ang kanilang mga anak sa bahay, dahil sa tingin nila ay baka manggulo lang ito sa service. Ngunit ito’y isang bagay lamang ng pagtuturo at pagsasanay.

Isa pang salita tungkol sa pagdalo: hindi nire-rekomenda ang paghihiwalay ng mga iglesiya, tulad ng children’s church, at youth church, at adult church, bagaman alam ko na ginagamit din ito ng Diyos para magdala ng kaligtasan at paglagong ispiritwal sa marami. Kung pag-aaralan mo ang mga kasulatan, hindi ka makakahanap ng kahit isang prinsipiyo tungkol sa paghihiwalay sa kanila; imbes, ang mga halimbawa ng kasulatan ay nagpapahiwatig ng isang pampamilyang pagdalo. (Tingnan ang Deuteronomy 16, lalo na sa talata 11; 31:12; gayundin ang Lukas 2, nang mag-dalawang-taong gulang na si Jesus.)

Paghahandog at Pagbibigay. Kung hindi sasanayin ang mga bata ngayon na magbigay, mas malamang na hindi sila magbibigay paglaon, o magiging madamot sila. Itanong, Tama ba para sa iyo na maglagay ng pera sa offering basket? Huwag mong isipin na matututunan nila ito paglaki. Nagsisimula ito NGAYON. Isang mahalagang halimbawa ng batang pagbibigay sa Biblia ay yung batang nagdala ng dalawang tinapay at limang isda kay Jesus. (Juan 6:8-10) Bagaman ang mas kapansin-pansin ay ang kamangha-manghang himala ni Jesus, ang maingat na pag-aaral ng kwentong ito ay ipapakita ang mapagbigay na puso ng batang iyon. Saan kaya nanggaling ang ganoong klaseng ispiritu?

Musika. Ano ang mga awiting gusto mo, mga action song o mga himno? Naaantok ka ba sa mga kinakanta sa service, at mas gusto mo yung mga action song? Bagaman hindi applicable sa lahat, ay reasonable naman na sabihin na kung ano ang kinakanta ng mga bata ngayon ay maaaring magdikta ng kakantahin nila bukas. Kung ang lahat ng kanilang inaawit ay mga mabababaw na awitin at wala man lang yung mas malalim, at may mayamang lingwahe, ang mga himno ay maaaring maging kakaiba sa kanila paglaon. At mas mahalaga, sabihin sa kanila kung bakit inaawit natin iyan, at bakit hindi natin inaawit ito—maaari itong makapagdagdag ng lakas sa paniniwala na nais mong mabuo sa kanila.

Upang magkaroon ka ng ideya sa kung paano tinrato ni Jesus at ng mga mananampalataya sa Bagong Tipan ang musika, tingnan ang mga sumusunod na mga talata: Matthew 26:30; Mark 14:26; Acts 2:46, 47; 16:25, 26; I Corinthians 14:15, 26; Ephesians 5:19; Colossians 3:16; James 5:13. Bagaman ang mga talatang ito ay hindi direkta na sa paggamit ng instrumento, ang hindi pagbanggit nito ay maaaring magbigay ng pahiwatig. Maaari mo ring pag-aralan ang mga instrumentong ginamit sa Lumang Tipan, at tingnan kung ang lahat ng mga ito ay ginagamit sa pagsamba sa templo.

Pagsamba at Paglilingkod. Isipin mo na ikaw ay nasa harap mismo ng Diyos, ano kaya ang gagawin mo? Nais mo bang sumali sa choir? Lumahok sa mga gawain sa church? Lumabas kasama ang isang matanda sa pagse-share ng Bible? O magturo? Ang paggalang at kagustuhan sumunod sa Panginoon ay hinuhubog at nililinang. Lumalaki ba sila na tumitindi ang kagustuhang paglingkuran ang buhay na Diyos?

 

Ang anumang mangyayari sa iglesiya ng hinaharap ay naka-depende sa atin. Siyasatin natin ang ating mga kasanayan. Maaaring tayo ay ignorante tungkol sa kung paano, ngunit ang Biblia ay hindi nagkukulang sa mga prinsipiyo at gabay para magawa mo iyon. Ang kailangan lamang nating gawin ay pag-aralan itong maigi.

Matuto tayo na hubugin sila. At sino’ng nakakaalam? Maaari silang gamitin ng Diyos upang baligtarin muli ang sanlibutan.

Children: The Church of Tomorrow

by Bro. Elijah Abanto

Kilala ko siya na mapagmahal sa mga bata. Minsan nga ay mas gusto pa niyang kasama ang mga bata kaysa makipag-usap sa mga ka-edad niya. At alam niya na dapat turuan nang mabuti ang mga bata na sumunod at mahalin ang Panginoon, at siya’y nag-aalala sa pagpapabaya ng ilang pastor sa mga ito tuwing may pagsasama-sama ang mga iglesiya. Kaya naman sinabi niya sa mga ito na kailangan ay may gawin sa mga batang ito.

Nadagdagan siya ng pagkakataon na makapaglingkod—ngunit sa parte ng mga pastor na iyon ay hindi kalugud-lugod. Sinabi nila na siya na bahala sa mga bata, wala na silang paki-elamanan kung ano’ng gagawin noong tao. Iniwan nilang lahat sa kanya.

Hindi ako laban sa taong iyon, ngunit sigurado ako hindi ko ginawa, at hindi ko gagawin, na purihin ang ginawa ng mga pastor na iyon. Pinababayaan nila ang mga bata. At ang mga bata ay mga tao rin. At ayaw ng mga tao na mapabayaan, ngunit ang ginawa ng mga iyon ay pagpapabaya. Kung walang binanggit siguro ang taong iyon sa kanila, hindi nila iisipin ang mga bata.

 

Ano’ng mangyayari sa iglesiya ng kinabukasan? Kung ipagpapatuloy ng mga iglesiya (at tayo personally) ang mga ganitong kasanayan, hindi ako magtataka kung kinabukasan ang ating mga bata ay maging mga talikod sa pananampalataya. Ang iglesiya ng kinabukasan ay magiging iglesiya ng apostasy sa hinaharap.

Tingnan mo na lang ang mga nangyayari ngayon. Maraming malalaking iglesiya ang hinihiwalay ang mga bata tuwing worship service at nililipat sa tinatawag na children’s church. At imbes na matanggap nila ang parehong pagpapalang natatanggap ng mga kabataan at mga matatanda sa pangangaral ng Kanyang Salita ay kumakanta lamang sila o naglalaro o natutulog. Ang mga lesson na itinuturo sa Sunday School ay puro mga Bible story imbes na mga importanteng doktrina na itinuturo sa Sunday School ng mga kabataan at matanda. At may kilala ka bang nagdidisipulo ng bata? O nakapag-share ka ba ng Bible sa isang bata sa iyong soul winning?

Alalahanin po natin—ang mga bata ang iglesiya ng kinabukasan. At anuman ang tinuturo natin sa kanila o hindi tinuturo sa kanila ang magdidikta kung ano ang magiging kapalaran ng iglesiya ng kinabukasan—kung isang matatag na iglesiya ito o isang sira-sirang grupo ng mga tao.

Basahin po natin ang Deuteronomy 6. Dito ay muli kang mapapaalalahanan ng kahalagahan ng mga bata. Pansinin ang talata 6-7,

At ang mga salitang ito, na aking iniuutos sa iyo sa araw na ito, ay sasa iyong puso; At iyong ituturo ng buong sikap sa iyong mga anak, at iyong sasalitain tungkol sa kanila pagka ikaw ay nakaupo sa iyong bahay, at pagka ikaw ay lumakad sa daan, at pagka ikaw ay nahihiga at pagka ikaw ay bumabangon.

Isang paalala din sa atin ito, mga magulang. Tayo, higit sa lahat ang dapat na magturo at magsanay sa mga anak natin na malaman ang Salita ng Diyos at mabuhay nang tulad kay Kristo. Sa bahay dapat nagsisimula ang ating mga “Sunday School,” “prayer meeting”—mga kasanayan natin sa iglesiya—sa tahanan iyan nagsisimula. At kailangan natin silang turuan at sanayin.

Magkaroon tayo ng isang check-up. Obserbahan mo ang isang bata sa ating iglesiya (maaaring iyong anak) tungkol sa pananampalataya natin at mga kasanayan. Kabilang dito ang mga sumusunod:

Doktrina. Tanung-tanungin mo siya tungkol sa mga pangunahing doktrina ng ating pananampalataya. Pareho kaya sa iyong pinaniniwalaan ang iyong anak? Kung hindi siya matatag dito ngayon, magiging mahirap na matutunan niya ito paglaki.

Pagdalo sa Iglesiya. Gusto niya bang um-attend o napipilitan lang siya? O sinanay mo ba siyang um-attend lamang ng umaga ng Linggo o pati gabi at Huwebes? Kung hindi mo pinapakita ang kahalagahan ng pagdalo sa iglesiya ngayon, malamang ay hindi rin niya matutunang dumalo sa iglesiya pagdating panahon.

Pagbibigay. May alam tungkol sa tithes, offerings o commitment ang iyong mga anak? Ngayon ba ay tinuturuan na silang gawin ito? Kaya ako natutong ibawas agad ang aking offering sa aking pera ay dahil sinanay ako noong bata pa ako na ibabawas sa baon ko yung tithes at offering.

Music. Ano’ng mga awit kaya ang paboritong kantahin ng bata? Puro kaya mga action song? Wala namang masama doon pero kung puro action song na lang at wala nang mga psalmo o malalalim na himno ng ating pananampalataya, malamang pagdating ng panahon ang aawitin niyan ay mga mababaw na Contemporary Christian Songs.

Pagsamba at Paglilingkod. Lumalaki ba ang bata na nagkakaroon ng malalim na pagkilala sa Diyos? Kapag kaya nakita niya ang Diyos eh, ano ang gagawin niya—luluhod o itatataas ang baba? Lumalaki ba siyang may kagustuhang maglingkod sa Diyos—mag-soul winning, umawit sa choir, o magturo? Ngayon iyan sinisimulan. Kung tamad sila ngayon sa church, bukas ganon din sila.

 

Ano ang mangyayari sa church of tomorrow? Nakadepende iyon sa atin. Itigil na natin ang pagpapabaya sa kanila. Linangin na lang natin sila na maging mga Cristiano na may takot sa Diyos. At sinong nakakaalam? Baka ang iglesiya ng kinabukasan ang siya pang muling magbaligtad ng sanlibutan—tulad ng ginawa ng unang iglesiya noon.